ఆగస్ట్‌ 9–11 వరకు బెంగళూరులో జరిగిన ‘బుక్‌ బ్రహ్మ లిటరేచర్‌ ఫెస్టివల్‌–2024’లో నేను కూడా పాల్గొన్నాను. ‘తెలుగు కథా ప్రపంచం’ అనే ఒక సెషన్‌కు నన్ను మోడరేటర్‌గా ఉండమని తెలుగు తరఫున బాధ్యతలు తలకెత్తుకున్న Ajay Varma Alluri అడిగాడు.
నిజానికి, ఇట్లాంటివాటిని విమర్శక శిఖామణులు అనేలాంటివాళ్లు నిర్వహించాలి. అందుకే ‘నో’ అని చెప్పేందుకు ఎన్ని కారణాలున్నా, ‘ఎస్‌’ అని చెప్పేందుకు ఏమైనా కారణాలున్నాయా అని చూసుకుంటే... గాల్లోనే ఒక బ్యాలన్స్‌ షీట్‌ కనబడింది. బెంగళూరు చూస్తాం, మూడు రోజులు సెలవులు, కొత్త అనుభవాలు...
ఇంకోటేందటే, ఈ మోడరేటర్‌ అనగానే కడుపులో తిప్పినట్టయిందిగానీ, దానికి కొనసాగింపుగా మైండులో ఇంకో ఫ్లో ఒకటి నడుస్తూనే ఉంది. ఇది అడగొచ్చా, అది అడగొచ్చా... అట్లా నాకు తెలీకుండనే ఇందులో ఇన్వాల్వ్‌ అయిపోయాను.
అయితే, ఇట్లాంటి సెషన్లను నిర్వహించడానికి అవసరమైన స్టేజ్‌ ఫియర్‌ను దాటడానికి నేను ఇంకా స్ట్రగుల్‌ అవుతూనే ఉన్నాను. కానీ ఏదోలా మేనేజ్‌ చేయగలిగాననే అనుకుంటున్నా.
తెలుగు కథా ప్రపంచం: చర్చ
బుక్‌ బ్రహ్మ లిటరేచర్‌ ఫెస్టివల్‌–2024
సెయింట్‌ జాన్స్‌ ఆడిటోరియం, కోరమంగళ, బెంగళూరు
ఆగస్ట్‌ 11, ఆదివారం; మంటప వేదిక, మధ్యాహ్నం 1:00–1:50
వక్తలు: వివినమూర్తి, మహమ్మద్‌ ఖదీర్‌బాబు, కుప్పిలి పద్మ
మోడరేటర్‌: పూడూరి రాజిరెడ్డి
మోడరేటర్‌గా ఉండటంలోని అడ్వాంటేజ్‌ ఏమిటంటే, చేతిలో పేపర్లు పట్టుకునే సౌలభ్యం ఉంటుంది. అట్లాగే ఎంత మూర్ఖంగానైనా ధ్వనించే లగ్జరీ ఉంటుంది.
నమస్తే బెంగళూరు. నమస్తే కర్ణాటక. నమస్తే సౌత్‌ ఇండియా.
భైరప్పను కన్న కర్ణాటకకు; శివరాం కారంత్, మాస్తి వెంకటేశ్‌ అయ్యంగార్‌ల కర్ణాటకకు రావడం మరో సంతోషం. బెంగళూరు వరకే తీసుకుంటే, ఈ నగర నిర్మాత కెంపె గౌడ తెలుగు మూలాలున్నవాడు కావొచ్చని చదివాను. ఆయన తెలుగులో ‘గంగ గౌరీ విలాసం’ అనే యక్షగానం రాశాడంట. తెలుగువాడిగా ఇదో అదనపు సంతోషం.
ఇవ్వాళ్టి చర్చకోసం ‘తెలుగు కథా ప్రపంచం’ అనే విస్తారమైన లైన్‌ ఇచ్చారు. తెలుగు కథా ప్రపంచం... అబ్బో! చాలా పెద్ద ఏరియా... ఇందులో ఉన్న డిసడ్వాంటేజ్‌ ఏమిటంటే, ఇంత పెద్ద బౌండరీ ఉన్నప్పుడు, ఏ దిశగా పోవాలో తెలీదు. దేని కేంద్రంగా మాట్లాడుకోవాలో తెలీదు. కానీ అడ్వాంటేజ్‌ ఏమిటంటే, ఈ కంక్లూజన్‌ రావాలన్న బలవంతం ఉండదు. చర్చను ఈ దిశగా నడపాలన్న ఒత్తిడి ఉండదు. ఏది మాట్లాడినా దీని పరిధిలోకే వస్తుంది. అలాగని కవికొండల వెంకటరావు, కనుపర్తి వరలక్ష్మమ్మ దగ్గరినుంచి మాట్లాడటం మొదలుపెడితే మనం ఎటూ తేలం. అందుకే కొంత వర్తమాన సాహిత్య ధోరణులకు పరిమితం అవుతాను.
తెలుగు కథా ప్రపంచంలో నాకెంత ప్రవేశం ఉంది?
అంటే నేను ఎన్ని కథలు రాశాను, ఎన్ని పుస్తకాలు వేశాను అనేది కాదిక్కడ. తెలుగు కథ అనే పెద్ద చుట్టుకొలతలో నేనెంతగా తిరిగి ఉంటాను అన్నది.
ఇంటికి పేపరొస్తుంది; రోజూ చదువుతాం. ఎంత చదువుతాం? ప్రతీ అక్షరం? ప్రతీ వార్త? అంటే పేపరు చదువుతాం, చదవం. కథాసాహిత్యం మీద కూడా నా పరిమితి, అవగాహన అదే.
సాహిత్యంలో రకరకాల వాదనలు/ భావజాలాలు ఉన్నాయి. నాకు వాటి మీద గట్టి విభేదాలుగానీ, గట్టి ఆమోదాలు గానీ లేవు. ఏది చేసే పని అది చేస్తుంది అనుకుంటాను.
విచిత్రంగా ఈ ముగ్గురు సీనియర్‌ రచయితలు మూడు రకాల భావజాలాలకు లేదా మూడు రకాల సాహిత్య పాయలకు ప్రతినిధులు.
కానీ నేను అనుకోవడం, ఏ ఒక్కరూ గిరి గీసినట్టు తాము ఇది రాస్తున్నాం కాబట్టి, ఇందులోనే ఉంటాం అనలేరు. ఆ గీతలను దాటి కూడా చాలా భావధార వాళ్లలో కూడా నడుస్తుంటుంది అనుకుంటాను.
వక్తలు అనేవారు వండి వార్చి పక్కనుంచిన పెద్ద గిన్నెల్లాంటివాళ్లు. అందులోంచి ఎంత తోడుకుంటాం అనేది మోడరేటర్‌ అనే గరిట మీద ఆధారపడి ఉంటుంది. నేను వీలైనంత పెద్ద గరిటలా ఉండటానికి ప్రయత్నిస్తాను.
(ఇక్కడినుంచి ప్రశ్నలు ప్రారంభం అవుతాయి. బీబీఎల్‌ఎఫ్‌ వాళ్లు అన్ని సెషన్స్‌ను యూట్యూబ్‌లో లైవ్‌ స్ట్రీమ్‌ చేశారు. ‘మంటప’ వేదికగా మూడో రోజు జరిగిన మా సెషన్‌ను 4 గంటల 27 నిమిషాల నుంచి వినొచ్చు.)
No comments:
Post a Comment